Што адбылося 100 год таму? Увосені 1918 году мастак "парыжскай школы" Марк Шагал заснаваў мастацкае вучылішча на сваёй малой радзіме ў горадзе Віцебск. Шагал запрасіў выкладаць у вучылішча многіх прагрэсіўных мастакоў таго часу. Так пачалася гісторыя "віцебскага авангарду". | |
Што такое авангард? Гэта мастацтва канца 19-га - пачатку 20-га стагоддзя, якое выйшла за рамкі класічнай эстэтыкі. Авангард - гэта наватарства, эксперымент і сімвалізм мастацкіх вобразаў. Адным з галоўных цэнтраў авангарднага мастацтва стаў горад Віцебск. | |
Віцебскі авангард звязаны з дзейнасцю ў Віцебскім мастацкім вучылішчы такіх авангардыстаў як Казімір Малевіч, Эль Лісіцкі, Вера Ермалаева, Марк Шагал, Давід Якерсон ды іншыя. Многія з іх былі раней вучнямі віцебскай Школы малявання і жывапісу Юдаля Пэна. | |
Рэалістычны жывапіс Юдаля Пэна Пэн імкнецца дакладна перадаць на палатне выгляд навакольнага асяроддзя. "Вам не след ісці ў поле, не трэба шпацыраваць па горадзе, звяртаць увагу на людзей, не трэба ісці ў тэатр, у царкву, у сінагогу - усё вы маеце перад сабой, усё стогне, плача на карцінах Пэна штохвілінна, і ўдзень, і ўначы, у суботу і ў свята." (М.Шагал, "Мой першы настаўнік) | |
Нерэалістычны жывапіс Марка Шагала Шагал, як і ўсе авангардысты, не бачыць патрэбы пераносіць на палатно дакладны выгляд знешняга свету. Для Шагала навакольнае асяроддзе - гэта проста вобразы для перадачы ўласных эмоцый і перажыванняў. Важным становіцца не знешні свет, а ўнутраны свет мастака. "Краіна Шагал" межавала з кубізмам, футурызмам, экспрэсіянізмам, сюррэалізмам, прымітывізмам, кубафутурызмам, беспрадметнай творчасцю. Але свет мастака ніколі не вымяраўся толькі па шкале "ізмаў". Шагал верыў не ў тэорыі, а ў таленты." (В.Ракіцін "Марк Шагал") | |
Беспрадметны жывапіс Казіміра Малевіча Малевіч лічыў, што мастак павінен займацца "чыстай творчасцю", а не перамалёўваць навакольнае асяроддзе. "Мастак можа быць творцам тады, калі формы яго карціны не маюць нічога супольнага з натурай. Трэба даць формам жыццё і права на індывідуальнае існаванне. Але мастак, будучы паняволеным утылітарным розумам, вядзе несвядомую барацьбу, то падпарадкоўваючыся рэчы, то нявечачы яе. Я ж змяніўся ў нуль форм і выйшаў за нуль да творчасці, гэта значыць да Супрэматызму, да новага жывапіснага рэалізму - беспрадметнай творчасці". (К.Малевіч "Ад кубізму і футурызму да супрэматызму") | |
Праект зацвярджэння новага Лазара Лісіцкага Проун ("проект утверждения нового") - прыдуманая Лісіцкім новая мастацкая сістэма, якая злучыла ідэю геаметрычнай плоскасці з законамі канструктыўнай пабудовы аб'ёмнай формы. Рэалізацыя ідэі "аб'ёмнага супрэматызму". "Проун - гэта перасадачная станцыя паміж жывапісам і архітэктурай" (Эль Лісіцкі) | |
Віцебск Юдаля Пэна "Разумееце, я люблю партрэтнасць горада. Кожны горад павінен мець свой партрэт. Вось наш Віцебск адрозніваецца ад усіх гародоў сваім абліччам..." (Ю.Пэн) | |
Віцебск Марка Шагала "Калі кіеўскія кубісты, нават малюючы канкрэтнае месца, схільныя да абагульненняў, то віцебскія мастакі прывязаныя да дакладных этнаграфічных прыкмет і дэталяў, якія ў іх творах робяцца важнымі кампазіцыйнымі і змястоўнымі элементамі. Але нягледзячы на такое імкненне да дакументальнай дакладнасці, сам вобраз мястэчка не страчвае свайго фантастычнага характару." (Р.Казоўскі "Мастакі Віцебска") | |
Віцебск Казіміра Малевіча У 1920 годзе Малевіч стварыў у Віцебску аб'яднанне УНОВІС ("Утвердители нового искусства"). УНОВІС спрабаваў вывесці супрэматызм у навакольнае асяроддзе, рэалізуючы ідэю Малевіча змяніць свет праз супрэматызм. "...Але гэты горад асабліва дзіўны. Тут вуліцы пакрытыя белай фарбай па чырвонай цэгле. А па белым фоне разбегліся зялёныя кругі. Аранжавыя квадраты. Сінія прамавугольнікі. Гэта Віцебск 1920 года. Па цагляных сценах яго прайшоўся пэндзаль Малевіча. Супрэматычныя канфеці, раскіданыя па вуліцах ашаломленага горада..." (С.Эйзенштэйн) | |
Супрэматычны сказ пра два квадраты У 1920 годзе ў Віцебску Лісіцкі "будуе" кніжку "Супрэматычны сказ пра два квадраты", якую выдае потым у Берліне. Кніжка апавядае пра тое, як супрэматызм прыйшоў на Зямлю, каб змяніць і арганізаваць увесь навакольны свет. Лічыцца, што чорны і чырвоны квадраты - гэта Малевіч і Лісіцкі. | |
Новае праектаванне Лазара Лісіцкага Пазней у часопісе "РЭЧ", які Лісіцкі выдаваў у Берліне на трох мовах, ён пісаў: "РЭЧ за мастацтва канструктыўнае, якое не ўпрыгожвае жыццё, але АРГАНІЗОЎВАЕ яго. Мы назвалі наш агляд "РЭЧ", бо для нас мастацтва - СТВАРЭННЕ НОВЫХ РЭЧАЎ." | |
Шмат стагоддзяў прадметнае і архітэктурнае асяроддзе заставалася амаль нязменным. У архітэктуры выкарыстоўвалася адна і тая ж ордэрная сістэма, адны і тыя ж кампазіцыйныя прынцыпы. Усё стваралася паводле аналогіі з чымсьці, што ўжо існуе. Мастакі, незалежна ад вобразна-філасофскай ідэі свайго твору, часцей за ўсё стараліся дакладна паўтарыць на палатне натуральны выгляд навакольнага асяроддзя. | |
У час авангарду мастакі перасталі дакладна капіяваць навакольнае асяроддзе, пакуль нарэшце зусім не адмовіліся ад яго. Тады мастакі пачалі рабіць цалкам абстрактныя творы, без ніякіх вобразаў знешняга свету. | |
Навучыўшыся абстрагавацца ад навакольнага свету, мастакі навучыліся ствараць зусім новае прадметнае асяроддзе і новую архітэктуру. Усё пачало стварацца не паводле ўзору і аналогіі, а згодна творчай волі мастака, дызайнера, архітэктара. | |